வற்றல் வகைகள் செய்யலாம் வாங்க..

மரியாதைக்குரியவர்களே,
 வணக்கம்.கொங்குத்தமிழ் மன்றத்திற்கு தங்களை வரவேற்கிறேன்.
 வற்றல் வகைகள் செய்யலாம் வாங்க..
(1)சுண்டை வற்றல்;
    ஒரு படி அளவுள்ள விளைந்த சுண்டைக்காய்களைப் பொறுக்கி எடுத்து க்கழுவி,வடிகட்டி அம்மியில் வைத்து லேசாக தட்டி நசுக்கிப்பிளந்து அரை லிட்டர் புளிப்பான மோரில்  ஒரு பிடி அளவு உப்பு,ஒரு டீஸ்பூன் மஞ்சள் தூள் போட்டு கரைத்து இத்துடன் பிளந்த சுண்டைக்காயைப்போட்டு மூடி வைக்கவும்இரண்டு நாட்களுக்கு கிளறி சுண்டைக்காய்களை நன்கு ஊறவைக்கவும்.பின்னர் மோரைவிட்டு எடுத்து வெயிலில் காயவைக்கவும்.சுமாராகக் காய்ந்த பிறகு அதே மோரில் மீண்டும் ஊறவைக்கவும்.இவ்வாறாக மோர் முழுவதும் காலியாகும்வரை கிளறி கிளறி ஊறவைத்து ஊறவைத்து காயப்போட்டு எடுத்து டின்களில் போட்டு பத்திரப்படுத்தி வைத்துக்கொண்டு பயன்படுத்தலாம்.
இவ்வாறாக,
 மோர் மிளகாய் வற்றல்,பாகற்காய் வற்றல்,கத்திரிக்காய் வற்றல்,மணத்தக்காளி வற்றல்,வெண்டைக்காய் வற்றல்,அவரைக்காய் வற்றல்,கொத்தவரைக்காய் வற்றல் போன்ற வற்றல்வகைகளையும் செய்யலாம்..

பருப்பு ரசம்உட்பட ரச வகைகள் வைக்கலாம் வாங்க...

மரியாதைக்குரியவர்களே,
            வணக்கம்.கொங்குத்தமிழ் வலைப்பக்கத்திற்கு இனிதே வரவேற்கிறேன்.
         பருப்பு ரசம்,தக்காளி ரசம்,மிளகு ரசம்,எலுமிச்சை ரசம்,சீரக ரசம்,தூதுவளை ரசம் வைக்கலாம் வாங்க...
  (1) பருப்பு ரசம்;
 தேவையான பொருட்கள்;
 துவரம்பருப்பு 100கிராம்,புளி எலுமிச்சை அளவு,மிளகாய் வற்றல் ஐந்து,மிளகு ஒரு ஸ்பூன்,மல்லிவிதை ஒரு ஸ்பூன்,சீரகம் மூன்று ஸ்பூன்,பூண்டு நான்கு பல்,பெருங்காயம் சிறிதளவு,தேவையான அளவு கடுகு,கறிவேப்பிலை,மஞ்சள் தூள்,கொத்துமல்லித்தழை,உப்பு ஆகியன.
செய்முறை;
 துவரம்பருப்பை வேகவைத்து எடுத்து மஞ்சள் தூள் சேர்க்கவும்,புளியைக் கரைத்து உப்பு மிளகாய்வற்றல்,கறிவேப்பிலை போட்டு கொதிக்கவிடவும்,மிளகு,சீரகம்,கொத்துமல்லிவிதை,கறிவேப்பிலை,பூண்டு வைத்து கரகரப்பாக நுணுக்கி வெந்த பருப்புத்தண்ணீரில் போட்டு கொதிக்கும் தண்ணீரில் சேர்க்கவும்,தேவைப்பட்டால் வெல்லம் சிறிதளவு சேர்க்கவும்.அதன்பிறகு கொதித்துவந்து நுரை கட்டியதும் கடுகு தாளித்து கொத்துமல்லித்தழை,கறிவேப்பிலையை போட்டு இறக்கிவைக்கவேண்டும்.ரசத்திற்கு உளுந்தம் பருப்பு போட்டு தாளிக்கக் கூடாது.
          கவனி; சாம்பார் மற்றும் ரசவகைகளுக்கு துவரம்பருப்பு,புளி,மிளகாய்வற்றல்,கொத்துமல்லிவிதை இந்த நான்கும் அவசியம்.தேவைப்பட்டால் சீரகம்,பூண்டு,பெருங்காயம்,கொத்துமல்லித்தழை,தக்காளி இவைகளையும் சேர்க்கலாம்  என்பதை தெரிந்துகொள்ளுங்க...
 (2)சீரக ரசம்;
  பருப்பு ரசத்தைப்போலவே செய்து  கூடுதலாக சீரகம் இரண்டு ஸ்பூன் சேர்க்கவும்.
(3)தக்காளி ரசம்;
            பருப்பு ரசத்தைப்போலவே செய்து புளியை மட்டும் பாதியாக குறைத்து 200கிராம் தக்காளி நறுக்கி கரைத்து சேர்த்தால் போதும் தக்காளி ரசம் தயார்..
(4)எலுமிச்சை ரசம்;
        பருப்பு ரசத்தைப்போலவே செய்து புளிக்குப்பதிலாக மூன்றுஎலுமிச்சை மட்டும் பிழிந்து பச்சை மிளகாய் எட்டு சேர்க்கவும்.எலுமிச்சை ரசம் தயார்.
(5)மிளகு ரசம்;
 ரசப்பொடிக்குப்பதிலாக ஒரு மேஜைக்கரண்டி மிளகுத்தூள் சேர்த்து துவரம்பருப்பு இரண்டு பிடி புளி எலுமிச்சை அளவு,பெருங்காயம் சிறிதளவு,கறிவேப்பிலை,கொத்தமல்லித்தழை,மஞ்சள்தூள் அரை ஸ்பூன் தேவையான உப்பு சேர்த்து செய்யவும்.
(6)தூதுவளைரசம்;
         மிளகு ரசத்தில் தூதுவளை இலை ஒரு பிடியும் வாதநாராயணன் கொழுந்து தேவையான அளவும் சேர்க்கவும். 

ரசப்பொடி தயாரிப்பது எப்படி? 
        
 மிளகாய் வற்றல், மல்லித்தூள், மிளகு,சீரகம், கடலைப்பருப்பு, துவரம்பருப்பு  இவைகளை வறுத்து கலந்து அரைத்து எடுத்து வைத்துக்கொள்வது ரசப்பொடி ஆகும்.
 

.புளியோதரை செய்யலாம் வாங்க..

மரியாதைக்குரியவர்களே,
         வணக்கம். கொங்குத்தமிழ் மன்றம் வலைப்பக்கம் வாங்க.......புளியோதரை செய்யலாம் வாங்க..
 தேவையான பொருட்கள் அரிசி 400கிராம்,புளி எலுமிச்சை அளவு,மிளகாய் வற்றல் பத்து,நல்லெண்ணெய் நூறுகிராம்,முந்திரிப்பருப்பு அல்லது நிலக்கடலை இருபது கிராம்,கடலைப்பருப்பு இரண்டு ஸ்பூன்,மல்லித்தூள் இரண்டுஸ்பூன்,கறிவேப்பிலை,உப்பு,கடுகு,உளுந்து,பெருங்காயம் தேவையான அளவு,
செய்முறை
 சோற்றை உதிரியாக வேகவைத்துக்கொள்ளவும்.வாணலியில் எண்ணெய் காய்ந்தபிறகு கடுகு போட்டு வெடித்ததும் உளுந்து,கடலைப்பருப்பு வறுத்து இத்துடன் பெருங்காயத்தையும் போடவும்.மிளகாயை இரண்டிரண்டாக கிள்ளிப்போட்டு பொன்னிறமாக வறுத்தபிறகு புளியை கரைத்து வடிகட்டி அதில் ஊற்றவும்.மல்லித்தூள் சேர்த்து தேவையானஅளவு உப்பு,மஞ்சள்தூள் சேர்க்கவும்.தண்ணீர் நன்றாக வற்றி எண்ணெய் மேலாக வரும்வரை கிளறிக்கொண்டே இருக்கவும்.அடுப்பிலிருந்து திறக்கும்போது கறிவேப்பிலையை போடவும்.முந்திரி அல்லது நிலக்கடலையை தனியே வறுத்து சோற்றில் சேர்த்து சிறிது நல்லெண்ணெய் சேர்த்துக் கிளறிய பிறகு புளிக்காய்ச்சலையும் சேர்த்து சோற்றை நன்கு கிளறவும்

தக்காளிச் சோறு செய்யலாம் வாங்க

மரியாதைக்குரியவர்களே,
 வணக்கம். கொங்குத்தமிழ் மன்றம் வலைப்பக்கத்திற்கு வாங்க..தக்காளிச் சோறு செய்யலாம் வாங்க...
 தேவையான பொருட்கள்
 அரிச 400கிராம்,தக்காளி கால் கிலோ கிராம்,நாட்டுத்தக்காளி சேர்த்தால் புளிப்பு அதிகமாக இருக்கும்.பெரிய வெங்காயம் ஒன்று,பச்சை மிளகாய் நான்கு,மிளகாய்த்தூள் இரண்டு  ஸ்பூன்,மஞ்சள் தூள் கால் ஸ்பூன்,கொத்துமல்லித்தூள் ஒரு ஸ்பூன்,தாளிக்க எண்ணெய் கடுகு,உளுந்தம்பருப்பு,கறிவேப்பிலை,உப்பு தேவையான அளவு 
செய்முறை
 சோற்றை குழைந்துவிடாமல் வேகவைத்துக்கொள்ளவும்,தக்காளியை பொடிப்பொடியாக நறுக்கி வைத்துக்கொள்ளவும்.வெங்காயத்தை நீளமாக பொடியாக  நறுக்கிவைத்துக்கொள்ளவும்.பச்சைமிளகாயை நீளமாக நறுக்கி வைத்துக்கொள்ளவும்.வாணலியில் எண்ணெய் ஊற்றி கடுகு,உளுந்து,தாளித்து அத்துடன் தக்காளி,வெங்காயம்,பச்சை மிளகாய் போட்டு சுருள வதக்கிக்கொள்ளவும்,மிளகாய்த்தூள் ,மஞ்சள்தூள் சேர்த்து வதக்கி பச்சை வாசனை நீங்கியபிறகு இறக்கிவைத்து சோற்றுடன் கலந்து அத்துடன் கறிவேப்பிலையை பச்சையாக சேர்த்துக்கிளறவும்.தொட்டுக்கொள்ள வெங்காயத்தயிர் பச்சடி நன்றாக இருக்கும்.

எலுமிச்சை சோறு

மரியாதைக்குரியவர்களே,
 வணக்கம். கொங்குத்தமிழ் மன்றம் வலைப்பக்கத்திற்கு வாங்க..எலுமிச்சை சோறு செய்யலாம் வாங்க...
 அரிசி 400கிராம்,எலுமிச்சை பழம் 2,பச்சைமிளகாய்10,கடுகு ஒரு ஸ்பூன்,உளுந்து ஒரு ஸ்பூன்,கடலைப்பருப்பு இரண்டு ஸ்பூன்,வெந்தயம் கால் ஸ்பூன்,பெருங்காயம் சிறிதளவு,முந்திரி ஐம்பது கிராம்,அல்லது நிலக்கடலை சேர்க்கலாம்.கறிவேப்பிலை,மஞ்சள்தூள்,எண்ணெய்,உப்பு தேவையான அளவு 
செய்முறை;
 முதலில் சோற்றை உதிரியாக வருமாறு குக்கரில் வழக்கமாக ஊற்றும் தண்ணீரீல் அரைப்பங்கு குறைத்து ஊற்றி சாதமாக வேகவைத்துக்கொள்ளவும். எலுமிச்சைப்பழத்தை கசப்பில்லாமல் பிழிந்து சாறு எடுத்துக்கொள்ளவும்.இதனுடன் உப்பும் மஞ்சள்தூளும் சேர்த்துக்கொள்ளவும்,வாணலியை அடுப்பில் வைத்து எண்ணெய் காய்ந்த பிறகு கடுகு,உளுந்து,வெந்தயம் தாளித்து எலுமிச்சைச்சாற்றில் சேர்த்துக்கொள்ளவும்.மீண்டும் வாணலியில் எண்ணெய் ஊற்றி கடலைப்பருப்பை பொன்னிறமாக வறுத்து அதில் முந்திரிப்பருப்பை சேர்த்து அளவாக வறுத்து சோற்றில்கொட்டிக் கலக்கி இத்துடன் எலுமிச்சைச்சாற்றுக்கலவையையும் சேர்த்து சோற்றை கரண்டியால் நன்கு கிளறி விடவும்.கவனி கடலைப்பருப்பையும் ,முந்திரியையும் எலுமிச்சைச்சாற்றில் சேர்த்தால் புளிப்பு ஏறிவிடும். அதனால்தான் தனியாக வறுத்துக்கொள்ள கூறியுள்ளேன். 
எலுமிச்சை சாதத்திற்கு தொட்டுக்கொள்ள பொட்டுக்கடலை,மிளகாய்,பூண்டு,உப்பு வைத்து அரைத்த துவையல் சிறந்தது.

துவரம் பருப்புச் சோறு

மரியாதைக்குரியவர்களே,
           வணக்கம். துவரம்பருப்புசோறு செய்யலாம் வாங்க...
 தேவையான பொருட்கள்;
 பச்சை அல்லது புழுங்கல் அரிசி 400கிராம்,துவரம் பருப்பு 100கிராம்,புளி எலுமிச்சை அளவு,மிளகாய் வற்றல் பத்து அல்லது பதினைந்து,சீரகம்-ஒரு ஸ்பூன்,வெள்ளைப்பூண்டு ஐந்து பல்,சின்ன வெங்காயம் 100கிராம்,மஞ்சள் தூள் அரை ஸ்பூன்,கறிவேப்பிலை இரண்டு கொத்து,கடுகு இரண்டு ஸபூன்,உடைத்த உளுந்து ஒரு ஸ்பூன்,நல்லெண்ணெய்25கிராம்,தேங்காய் அரைமூடி,உப்பு தேவையான அளவு.
செய்முறை;பரமேஸ் டிரைவர்
 முதலில் மிளகாய் வற்றல்,சீரகம்,பூண்டு ஆகியவற்றை நன்கு மசித்துக்கொள்ளவும்,சாம்பார் வெங்காயத்தை அம்மியில் வைத்து ஒன்றிரண்டாக தட்டி எடுத்துக்கொள்ளவும்,புளியை ஒரு டம்ளர் தண்ணீரில் ஊறவைத்து நன்றாக கெட்டியாக கரைத்து வைத்துக்கொள்ளவும்,தேங்காயை துருவி வைக்கவும்,
 பின்னர் குக்கரை அடுப்பில் வைத்து ஒரு பங்கு அரிசிக்கு மூன்று பங்கு தண்ணீர் என்ற விகிதத்தில் ஊற்றவும்,அரிசியையும்,பருப்பையும் நன்கு கழுவி அதில் கரைத்த புளி,மசித்த மிளகாய்விழுது,வெங்காயம்,தேங்காய்த்துருவல்,மஞ்சள் தூள்,உப்பு,உருவிய கறிவேப்பிலை போட்டு கரண்டியால் கலக்கி பிறகு குக்கரை மூடி அடுப்பில் பத்து நிமிடம் சமைக்கவும்,சோறு வெந்தபிறகு இறக்கிவைத்து ஆவி அடங்கியபிறகு நல்லெண்ணெய் ஊற்றி கடுகு,உளுந்தம் பருப்பு,வடகம் தாளித்து குக்கரில் வெந்த சாதத்தில் கொட்டிக் கிளறவும்.பிறகு ஜவ்வரிசி வடகம் அல்லது அரிசி வடகம் தேங்காய் எண்ணெயில் பொரித்து எடுத்துக்கொள்.சாப்பாட்டிற்கு தொட்டுக்கொள்ள நன்றாக இருக்கும்.

கறிவேப்பிலை துவையல்

மரியாதைக்குரியவர்களே,வணக்கம்.
  வீட்டில் கருவேப்பிலை அதிகமாக இருந்தால் கவலைப்படாதீங்க. கறிவேப்பிலைத் துவையல் செய்யுங்க
தேவையான பொருட்கள்: கருவேப்பிலை ஒரு கப், சின்ன வெங்காயம் 2, பச்சை மிளகாய் 3, புளி சிறிதளவு, தேங்காய் துருவல் சிறிதளவு, உப்பு, எண்ணெய் 2  ஸ்பூன்.
செய்முறை: கருவேப்பிலை, பொடியாக நறுக்கிய வெங்காயம், மிளகாய் இவற்றை ஒரு ஸ்பூன் எண்ணெய் விட்டு வதக்கிக் கொள்ளவும். ஆறிய பின் மிக்ஸியில் போட்டு, புளி, தேங்காய் துருவல், உப்பு சேர்த்து, சிறிதளவு தண்ணீர் சேர்த்து கர கரப்பாக அரைத்துக் கொள்ளவும். ஒரு ஸ்பூன் எண்ணையில் கடுகு தாளித்து கொட்டவும்.
ரசம், சாம்பார் சாதத்திற்கு அருமையான காம்பினேஷன். இட்லிக்கு தொட்டுக்கொள்ளவும் சுவையாக இருக்கும்.